Esporokarpo
![](http://upload.wikimedia.org/wikipedia/commons/thumb/3/32/Amanita_muscaria_3_vliegenzwammen_op_rij.jpg/220px-Amanita_muscaria_3_vliegenzwammen_op_rij.jpg)
![](http://upload.wikimedia.org/wikipedia/commons/thumb/7/71/Perretxikoaren_eskema.jpg/220px-Perretxikoaren_eskema.jpg)
Onddoetan, esporokarpoa edo fruitu-gorputza esporak ekoizten dituzten egiturak (basidioak edo askuak) eusten dituen egitura zelulanitza da. Fruitu-gorputza onddoen bizi-zikloaren fase sexualean parte hartzen du; bizi-zikloaren gainerako denbora mizelioaren hazkuntza begetatiboan oinarritzen da.
Basidiomikotoen esporokarpoari basidiokarpo deitzen zaio, eta askomikotoen esporokarpoari askokarpo deritzo. Bai multzo batean zein bestean fruitu-gorputzen askotariko formak eta morfologiak daude. Hain zuzen, onddoen identifikazio eta taxonomiarako ezaugarri garrantzitsua izan ohi da.
![](http://upload.wikimedia.org/wikipedia/commons/thumb/6/67/Scarlet_elf_cap_cadnant_dingle.jpg/220px-Scarlet_elf_cap_cadnant_dingle.jpg)
Fruitu-gorputzak epigeoak dira lurgainean hazten badira. Lurrazpian hazten badira, hipogeoak direla esaten da. Lehen begiratuan ikusten diren esporokarpo epigeoak hizkera arruntean perretxiko deiturikoak dira. Onddo hipogeoen fruitu-gorputzei, berriz, boilur edo boilur faltsu deitzen zaie. Bigarrenek esporak barreiatzeko estrategia berezia garatu dute: animaliek lurpetik atera eta jan egin behar dituzte esporak hedatu ahal izateko.
Perretxiko-biltzaileek esporokarpoaren ezaugarriak erabiltzen dituzte gehien bat onddo-espezieak bereizteko.
Kanpo estekak
Datuak: Q1132089