Ohar medikoaOharra: Wikipediak ez du mediku aholkurik ematen. Tratamendua behar duzula uste baduzu, jo ezazu sendagilearengana.
Vincenten angina edo gingibitis ultzeroso nekrotizatzailea bakterio batzuek ahoan eragindako infekzioa da, lesio ultzerosoak eta hantura sortzen dituena hortzoietan eta amigdaletan. Garai batean ohikoa izan arren, gaur egun gaixotasun arraroa da, ahoaren higienea asko hobetu delako herrialde gehienetan. Urria izan arren, larria izan daiteke, eta era egokian tratatu ezean ondorio gaiztoak eragin ditzake (besteak beste, bakteriemia eta infekzio metastasiko barreiatua). Hyacinthe Vincent medikuaren omenez du izen hori.
Etiologia
Gaitz honen atzean bakterio anaerobio batzuk daude. Bi bakterioen elkarketak sortzen du kasu gehienetan gaixotasuna: Fusobacterium necrophorum eta Borrelia vincentii. Treponema generoko hainbat espiroketak ere Vincenten anginaren eragileak dira.
Tabakismoak, estresak eta aho-higienearen ezak gaitzaren agerpena errazten dute. Baita immunitate-sistemaren egoera ahulak ere.
Sintoma klinikoak
Honako hauek dira nagusiak:
hantura, lesio ultzerosoak eta odola hortzoietan eta amigdaletan
Ohiko sintomatologia duten gaixoei lagin bat hartzen zaie ahotik gaitzaren diagnostikoa baieztatzeko: isipu esteril batekin ahoan dauden lesio ultzerosoetatik lagin batzuk hartzen dira, eta frotis bat prestatzen da. Gram tindaketa aplikatu ostean ohiko bi patogenoen presentzia antzematen da: espiroketa Gram negatiboak (Borrelia) eta bazilo fusiforme luzeak, Gram negatiboak (Fusobacterium)
Tratamendua
Infekzioa sendatzeko ahoa ondo garbitu behar da irakuzketen bidez: ur gaziaren irakuzketak egiten dira, eta baita ur oxigenatuarenak ere. Odontologoek aho garbiketa sakona egin beharko dute, kaltetutako ehunak onera ekartzeko.